БИШКЕК, 23-мар. — Sputnik. Кыргызстанда бизнести колдоо боюнча антикризистик план иштелип жатат. Бул туурасында вице-премьер Эркин Асрандиев маалымат жыйын учурунда билдирди.
Анын айтымында, бүгүнкү күндө ишкерлерге салык жаатында жеңилдик берүү каралып жатат.
"Биринчи кезекте Улуттук банк тарабынан коммерциялык банктарга насыяны төлөө мөөнөтүн кечиктиргендерге айып пул салынбасын деген чечим чыккан. Ал эми насыянын негизги суммасын жана пайыздарын төлөө эң аз дегенде үч айга жылдырылсын деген сунуш берилген. Бирдиктүү салык декларациясын тапшыруу мөөнөтүн узартуу каралууда. Ошондой эле мамлекеттик көзөмөлдөөчү органдардын ишкерликти текшерүүсүн дагы бир жылга узартуу каралууда. Дагы башка салык жагынан жеңилдетүүлөр иштелип жатат", — деди Асрандиев.
Мындан сырткары, ал өлкөдө тамак-аш тартыштыгы жаралбай турганын эскертти. Казакстан менен Өзбекстандын чек арасы жүк ташууга ачык экенин эскертип, өлкө ичинде аймактар аралык жүк ташууга да чек коюлбаганын белгиледи.
