БИШКЕК, 23-мар. — Sputnik. Коронавирус жуктурган кыргызстандыктарды абалына жараша өз-өзүнчө дарылап жатат. Бул туурасында Коомдук саламаттык сактоо башкармалыгынын башчысы Айнура Акматова маалымат жыйын учурунда билдирди.
Анын айтымында, азырынча дүйнөдө коронавирусту ооздуктоого вакцина чыгарыла элек, андыктан бейтаптарга биринчи кезекте вируска каршы каражаттар колдонулууда.
“Бизде Дүйнөлүк саламаттык сактоо уюмунун сунуштамалары бар. Оорунун деңгээлине жараша антибиотик менен дарылоо каралган. Албетте, оорунун күчөп кетпешин алдын алуу үчүн препараттар колдонулууда. Ар биринин абалына карап өзүнчө дарылайбыз”, — деди Акматова.
Ошондой эле ал коронавирус жуктургандарды карап жаткан медиктерге эки эсе көп маяна төлөнө турганын белгиледи.
Кыргызстандагы коронавирус жана өзгөчө кырдаал
Эске салсак, Кыргызстанда 18-мартта коронавирус биринчи жолу Сауд Аравиядан кичи ажылыктан келген үч адамга жукканы аныкталган.
Өкмөт 22-марттан баштап Кыргызстандын аймагына өзгөчө кырдаал жарыялады.
Ал эми ушу тапта өлкө аймагындагы кырдаал тууралуу маалыматтардын баарын биздин тексттик трансляциядан билсеңиз болот.
