БИШКЕК, 22-мар. – Sputnik. Сузак районундагы Кызыл-Туу айыл аймагына караштуу Бостон айылынын көчөлөрү дезинфекциялана баштады. Бул тууралуу ӨКМдин маалымат кызматы кабарлады.
Жалал-Абаддын Сузак районунда коронавирусту жуктуруп алган кишилердин бар экени анык болгондон бери аталган районго өзгөчө кырдаал киргизилип, оорукана, көчөлөрү дезинфекцияланууда. Жергиликтүү тургундар үйүнөн чыкпай калышканын айткан.
Коронавирус Кыргызстанда
Кыргызстанда 18-мартта коронавирус биринчи жолу Сауд Аравиядан кичи ажылыктан келген үч адамга жукканы аныкталган. Үчөө тең Жалал-Абад облусуна караштуу Сузак районунун тургундары. Алар менен кошо 12-мартта бир каттамда Бишкекке 144 адам келген. Анын экөө Өзбекстанга кетип, калган 142си изоляцияга алынган.
21-мартта дагы Сузактын беш, Бишкектин эки, Баткендин бир тургунунан COVID-19 аныкталды.
Акыркы маалыматтар боюнча, жалпы вирус жуктуруп алгандардын саны 14кө жетти.
Мындан улам өкмөт 22-марттан баштап Кыргызстандын аймагына өзгөчө кырдаал жарыялады.
