БИШКЕК, 20-мар. — Sputnik. Коронавирус боюнча өлкөдө түзүлгөн кырдаалга байланыштуу Ош шаарында төрт базар жабылууда. Бул туурасында калаа мэриясынан билдиришти.
Маалыматка ылайык, бүгүндөн тарта борбордук автоунаа базары, автоунаа тетиктерин саткан базар, кийим-кече саткан борбордук жана "Келечек" базары убактылуу жабылат. Ошондой эле мал базары дагы убактылуу иштебейт. Мындай аракеттер алдын алуу чаралардын алкагында көрүлүүдө.
Кандайдыр бир суроолор жаралса, Ош шаарынын мэриясынын ишеним телефону (03222) 5-53-84 күнү-түнү жооп берет.
Мындан сырткары, Баткендеги базарлар дагы жабылууда.
Шаардын борбордук базары, Тажикстан менен чектешкен "Самаркандек" базары, "Кара-Бак" базары, Кадамжайдагы "Халмион" базары жана башка дагы ушул сыяктуу облус, район, шаарлардагы ири базарлар иштебей турган болду.
Ошондой эле мал базарлары, автоунаа базарларынын иштешине да тыюу салынат.
