БИШКЕК, 27-фев. — Sputnik. Белгилүү актер жана режиссер Жеки Чан коронавирус жуктурду деген шек менен карантинге алынганы туурасындагы маалымат калп болуп чыкты.
Кечээ күнү бир катар чет элдик ЖМКлар Голливуд жылдызы кечелердин бирине баргандан кийин вирусту жуктуруп алып, карантинге алынганын жазып чыгышкан.
Чет элдик ЖМКлар бул жаңылыкты Sputnik Испания агенттигине шилтеме берип жазышты. Бирок агенттиктин жаңылыгында "Жеки Чан ооруп калды деген маалымат чындыкка дал келбейт" деп жазылган.
"Эң күлкүлүүсү — актер ал кечеге барган дагы эмес. Чан алар менен кошо майрамдаганын айткан кишинин видеосу фейк болуп чыкты. Аныгында актер башка кечеде болгон", — деп айтылат Sputnik Испаниянын маалыматында.
8Days порталынын журналисттери дагы иликтөө жүргүзүп, натыйжада вируска кабылган полиция кызматкери менен Жеки Чан эки бөлөк кечеде болгонун аныктаган.
Андагы маалыматка караганда, полициянын офицери Гонконгдун батыш бөлүгүндөгү ресторанда болсо, Жеки Чан достору менен Yau Yat Chuen Garden City клубунда эс алган. Эки жайдын аралыгы жарым сааттык жол.
