БИШКЕК, 19-фев. — Sputnik. Электр энергиясына болгон социалдык тарифти жок дегенде инфляция менен бирге өскүдөй кылып көтөрүү керек. Мындай пикирин Улуттук энергохолдингдин Стратегиялык өнүгүү жана адам ресурстары башкармалыгынын жетекчиси Кубаныч Беков билдирди.
Төртүнчү ирет өтүп жаткан "Гидроэнергетика. Борбордук Азия жана Каспий - 2020" аталышындагы конгресс-көргөзмөгө катышып жатып жетекчи бир киловатт-сааттын өз наркы 169 тыйын болсо, сатылган баасы 136 тыйын экенин айтты.
"Ар бир киловаттына 30-33 тыйындан жетпей калат. Андыктан тарифтерди бери дегенде чыгымсыз иштей турган деңгээлге жеткирүүнү сунуштап жатабыз. Ушул эле учурда даректүү социалдык колдоо көрсөтүлүшү керек", — деди Беков.
"Кеп ага чейинки социалдык тариф, тагыраагы, 77 тыйын тууралуу болуп жатат. Электр энергиясынын 70 пайызы ушул тариф аркылуу кетет", — деди адис.
Бирок ал тариф маселеси холдингдин компетенциясына кирбесин, ага Мамлекеттик отун-энергетика комплексин жөнгө салуу агенттиги жооп берерин кошумчалады.
