Эрмегалиев: уйку канбаса, бардык органдардын функциясы бузулат
Уйку адам үчүн өтө керектүү нерсе. Өз учурунда жетиштүү уктабаса көп оорулардын пайда болушуна шарт түзүлөт. Бул тууралуу Кубанычбек Эрмегалиев Sputnik Кыргызстан радиосунун эфиринде маек куруп жатып билдирди.
Анын айтымында, уйкусу канбаган адамдын тамакка болгон табити төмөндөп, арыктай баштайт.
"Уйкунун узактыгы жашка жараша айырмаланат. Уктап жатканда адамдын денеси, нерви калыбына келип, эс алат. Уйку канбаса психика бузула баштайт. Адам тамак жебей бир жумалап жүрө берсе, уйкусуз 2-3 күн гана жүрө алат. Уктап жатканда кишинин борбордук нерв системасы, жүрөк, кан тамырлар, боор жана башка органдар калыбына келет. Эгерде уйку начар боло баштаса, бардык органдардын иштеши бузулат. Биринчи кезекте мээ, нерв системасы жабыркайт. Адамдын жөндөмдүүлүгү мурдагыдан эки эсе азаят. Ишке көңүл бөлүүсү, каалоосу жоголуп, жасаган жумушунун сапаты начарлайт. Андан тышкары, уйкусу канбаган адамдын ачуусу бат келип, көңүлү көтөрүлбөйт. Көңүл чөгүү депрессияга алып келет. Учурда депрессияга кабылып, жардам сураган адамдар өтө көп. Бул азыркы маалдын оорусу десем да туура болчудай. Өзгөчө өспүрүмдөр, жаштардын психикасы бузулса, бул нерсе күчөп отуруп акыры суицидге алып барышы мүмкүн", — деди Эрмегалиев.
Ал уйкуну кандыруу үчүн бир режимди карманып, күндө бир убакытта жатып, бир убакытта туруу керектигин кошумчалады.
