Радиостудия Sputnik Кыргызстан в Бишкеке - Sputnik Кыргызстан
Радио

Бакетаев: шаардыктардын демилгесин каржылоого 150 млн. сом бөлүнөт

© Sputnik / Эркин СадыковБишкек шаарынын экономикалык жана каржылык саясат боюнча вице-мэри Алмаз Бакетаев. Архив
Бишкек шаарынын экономикалык жана каржылык саясат боюнча вице-мэри Алмаз Бакетаев. Архив - Sputnik Кыргызстан
Жазылуу
Бишкек шаарынын экономикалык жана каржылык саясат боюнча вице-мэри Алмаз Бакетаев калаанын өнүгүүсүнө салым кошууну каалаган жергиликтүү тургундар үчүн атайын "Жарандык демилге" долбоору иштелип чыкканын айтты. 
Бакетаев: шаардыктардын демилгесин каржылоого 150 млн. сом бөлүнөт

Бишкектиктер калаа бюджетинин пайдалуу долбоорлорго сарпталышына катышып, шаардын инфраструктурасын жакшыртуу багытында демилге көтөрө турган болсо, мэрия аны колдоп берүүгө даяр. Бул тууралуу Алмаз Бакетаев Sputnik Кыргызстан радиосуна маек куруп жатып билдирди.

Анын айтымында, 2020-жылга кабыл алынган калаа бюджетинин эсебинен "Жарандык демилге" долбооруна атайын 150 миллион сом бөлүнөт.

"Бишкек шаарынын мэриясы быйыл "Жарандык демилге" аттуу долбоорду ишке ашырууну көздөп жатат. Анын алкагында калаа тургундары шаардык бюджеттин сарпталышына түздөн-түз катышып, жергиликтүү инфраструктураны жакшыртууга көмөк көрсөтө алышат. Бул демилгенин пайда болгону да жөн жерден эмес. Анткени Бишкектеги ири курулуштарга өзгөчө маани берилип, ал эми таштанды челектерин орнотуу, балдар үчүн ойной турган жайларды куруу, жарыктандыруу өңдүү күнүмдүк маселелер көңүл сыртында калып келди. Эми үстүбүздөгү жылдан тарта жергиликтүү тургундардын кайрылуусу менен аталган көйгөйлөр четинен чечиле баштайт. Болгону бишкектиктер жергиликтүү өз алдынча башкаруу органдары аркылуу мэрияга кайрылуу жолдоп, маселени түшүндүрүп берүүсү керек. Ал эми иштин жүрүшүнө Бишкек шаардык кеңеши көзөмөл кылат. Бүгүнкү күндө борбордун төрт районуна 150 миллион сом бөлүндү. Бул каражат бир гана жарандар көтөрүп чыккан маселелерди жөнгө салууга жумшалат. Мындан улам калаа тургундарын активдүү болууга чакырам. Эгер жыл ичинде бир да демилге көтөрүлбөсө аталган каражат күйүп кетет. Муну да эстен чыгарбоо керек ", — деди Бакетаев.

Аткаминер "Жарандык демилге" долбооруна бөлүнгөн каражатты стимулдук грант менен алмаштырбоо керектигин айтып, аталган грант мурунку эле тартибинде бериле берерин кошумчалады.

Жаңылыктар түрмөгү
0