БИШКЕК, 16-янв. — Sputnik. Жогорку Кеңештин депутаттары Германиядан алына турган насыя менен грантты ратификациялоо тууралуу мыйзам долбоорун кароодон баш тартып, күн тартибинен алып салды.
Бул мыйзам долбоорунун биринчи этабында Кыргызстан Германиянын өнүктүрүү банкынан 9 миллион евро грант алган. Ал эми экинчи этабында 22 миллион евро кредит, 5 миллион евро грант алуу пландалууда. Финансы министринин орун басары насыянын шарттары тууралуу кенен маалымат бере алган жок.
Бүгүн, 16-январда, парламенттин жалпы жыйынында 2017-жылдын 18-сентябрында Франкфурт-на-Майне шаарында кол коюлган "Агрардык өндүрүштүк-сатып өткөрүү байланыштарын каржылоо" долбоору боюнча Кыргызстан менен Германия өнүктүрүү банкынын (KfW) ортосундагы Каржылоо жөнүндө келишимди ратификациялоо тууралуу" мыйзамдын долбоору экинчи окууга киргизилген.
