БИШКЕК, 7-янв. — Sputnik. Борбор калаада эркин жана грек-рим күрөшү боюнча Кыргызстандын чемпионаты өтөт. Бул туурасында Жаштар иши, дене тарбия жана спорт агенттигинен билдиришти.
Маалыматка ылайык, мелдеш Кожомкул атындагы спорт сарайында болмокчу. 9-10-январь күндөрү эркин күрөш боюнча балбандар күч сынашат. Ал эми 11-12-январь күндөрү грек-рим күрөшү боюнча өлкөнүн чемпиондору аныкталат.
Бул чемпионатта алдыңкы орунду алып, мыктылыгын көрсөткөн балбандардан Кыргызстандын улуттук курама командасы түзүлөт. Алар Азия чемпионатына жана башка дүйнөлүк мелдештерге катышып, быйыл Токиодо өтө турган Олимпиадага лицензия алуу үчүн күрөшөт.
