Азимов: ИДПнын 30 пайызы айлык акыга кетип жатат
Ички дүң продукциянын 30 пайызы айлык акыга кетип жатат, бул абдан көп. Мындай пикирин Алмазбек Азимов Sputnik Кыргызстан радиосунун эфиринде маек куруп жатып билдирди.
Анын айтымында, башка мамлекеттерде ИДПнын 3 – 3,5 пайызын гана маянага жумшашат.
"Өлкөнүн күнүмдүк чыгашаларынын суммасы 142 миллиард сомду түзөт. Анын 30 пайызы эле мамлекеттик кызматкерлердин айлык акысына кетип жатат. Бул — коммуналдык кызмат, башка жеңилдиктерин кошпогондогу сумма. Мындан сырткары, 50 пайызы социалдык багыттарга бөлүнөт. Ал эми өнүгүү бюджети 30 миллард сомго гана жетүүдө. Жакырчылык мына ушунун негизинде пайда болууда. Андыктан биз ички дүң продукцияны көтөрүү менен абалды жөнгө сала алабыз", — деди Азимов.
Аткаминер ошондой эле ишкерлерге жылына 25 миллиард сом өлчөмүндө салык жеңилдиктери берилерин, бирок анын натыйжасында экономикада өсүү болбой жатканын кошумчалады.
