БИШКЕК, 18-дек. — Sputnik. Кыргыз-тажик чек арасындагы Көк-Таш айылында болгон жаңжалдан акыркы алдын ала маалымат боюнча беш киши түрдүү жаракаттарды алды. Алардын бирөөсүнө ок тийгенин Чек ара кызматынан кабарлашты.
17-декабрда коңшу мамлекеттин жарандары делген кишилер Көк-Таш айылына бараткан жолдо, чек арага жакын жерден кыргызстандык кишини сабап кеткен. Жабыркаган адам Баткен облустук ооруканасына жеткирилип, медициналык жардам көрсөтүлгөн. Бүгүн эки мамлекеттин тийиштүү органдары чогулуп, көйгөйдү жөнгө салуу боюнча жолугушуу өткөрүп жаткан маалда тажик тараптагылар таш ыргытып, ок чыгарган. Андан бир милиция кызматкерине ок тийген.
"Баткен облустук ооруканасында ИИМдин ички аскерлеринин жоокерине операция жасалууда. Алдын ала маалымат боюнча, Кеңеш айылдык кеңешинин депутатына да ок тийген", — деп айтылат маалыматта.
Учурда эки мамлекеттин чек арачылары, облустук, райондук администрациянын жетекчилери жана укук коргоо органдарынын өкүлдөрү жолугушууну улантып жатат.
Кыргыз-тажик чек арасындагы абалды турукташтыруу максатында Баткен облусунун Башкы штабдын жетекчиси — Мамлекеттик чек ара кызматынын төрагасынын биринчи орун басары Абдикарим Алимбаев, ички иштер министринин биринчи орун басары Сүйүнбек Өмүрзаков учуп кетти.
