БИШКЕК, 9-дек. — Sputnik. Бишкекте машинадан 8 миң доллар жана документтер салынган баштыкты алып кетти деп шектелген киши кармалганын Октябрь РИИБдин маалымат кызматы билдирди.
2-декабрда милицияга жабыркаган киши кайрылып, анын буюмдарын уурдап кеткендерге чара көрүүнү суранган. Жапа чеккен кишинин айтымында, 2-декабрда саат 11:45 менен 12:30дун ортосунда белгисиз адамдар Toyota 4Runner үлгүсүндөгү автоунаасынын терезесин сындырып, акчасын жана документтерин уурдап кеткен.
Уурулук фактысы боюнча 25 жаштагы киши шектүү катары кармалып, соттун чечими менен №1 тергөө абагына эки айга камакка алынган.
Шектүүнүн катышуусу менен атайын тергөө аракети жүрүп, ал айдап жүргөн автоунаадан "Форт 12рм" үлгүсүндөгү тапанча, төрт патрон, бычак, эки рация, дүрбү, автоунаанын номери, кол кап жана башка заттар табылган.
Учурда экспертиза дайындалды. Шаардык милициядан кабарлашкандай, кармалган кишинин башка кылмыштарга дагы тиешеси болушу ыктымал.
Биздин Telegram-каналга жазылыңыз.
