БИШКЕК, 26-ноя. — Sputnik. 1-январдан тарта Кыргызстандагы май куюучу жайларда мунай заттарын эсептөөнүн автоматташтырылган системасы колдонула баштайт. Бул туурасында Экономика министрлигинин маалымат кызматынан кабарлашты.
Жаңы талаптар Кыргызстанга ташылып келген, сакталган, сатылган жана өндүрүлгөн күйүүчү жана майлоочу майларга болгон көзөмөлдү күчөтүү максатында киргизилип жатат.
Өзгөрүүлөр:
- Күйүүчү майды мунай заттарынын базасына же резервуарына ээлик кылган жактарга гана дүңүнөн сатууга мүмкүн болот;
- Чекене соодалоо май саткан бекеттерде гана болот. Ал жерде кассалык-көзөмөл машиналарынын иштеши, ал эми май куйган колонкалары автоматташуусу шарт;
- Мындагы өзгөчөлүк: акча төлөмөйүн жана кассалык-көзөмөл машиналары чек бермейин кардарга май куюлбайт, тагыраагы, автоматташкан система иштебейт;
- Система майдын сатылганы боюнча маалыматты салык кызматынын серверине онлайн-тартипте берип турат;
- Эгерде каттоо системасы коюлган талаптарга жооп бербесе, бекетте май сатууга тыюу салынат;
- Аталган системаны тез арада орнотуп алган ээлерине май куюлган ал жердеги люктарды пломбалоо жана аны кайра сыйрып салуу иштери жасалбайт;
Мунай заттарын өндүргөндөр же ташып келген ишканалардын жөнөткөн, алган тарап, транспорт жана башкалар туурасында товар тастыктаган кагаздын электрондук түрдөгүсү кошо болушу шарт.
Анткен менен өкмөт буга чейин мунай заттарын соодалоодогу жогорудагыдай системаны орнотуу жана сатып алууда жеңилдик берүү боюнча мыйзам долбоорун иштеп чыгуу ниетин билдирген. Жеңилдиктин бир жылга берилүүсү каралууда.
