БИШКЕК, 24-ноя. — Sputnik. Жогорку Кеңештин депутаты Искендер Матраимов көпчүлүк бир тууган иниси Райымбек Матраимов анын дарегине айтылып жаткан айыптоолорго эмнеге жооп бербей жатканы боюнча суроо узатып жатышканын жазды.
Эл өкүлү анын бир тууганы элди дүрбөлөңгө салган маселе боюнча өз пикирин айтканын маалымдап, билдирүүсүн жарыялады. Анда Райым Матраимов акыркы эки жылдан бери кайсы бир саясий топтор аны каралоо максатында түрдүү божомолдорду, ар кандай жалган маалыматтарды таратып жатканына токтолгон.
“Мунун баарына качандыр бир кезде чекит коюлат деп ойлоп жүргөм. Бирок акыркы жети ай ичинде бул каралоо акциясы башка деңгээлге чыкты. Айрым журналисттер ошол саясий топтордун куралына айланып, мени өлкөдөгү бардык экономикалык проблемалардын себеби катары сыпатташса, бүгүн ойго келбес, кечирилгис кылмыштарды мага шылтап, жалган жалаа жабууга өтүштү. Мени кызмат ордума кайра коюу боюнча сот чечиминен соң өз каалоом менен Бажы кызматына кайра барбоону чечкем жана тынч жашоо максатында бизнес менен алектенейин деп чет өлкөгө кеткен элем. Ошентип сыртта жүргөн учурда мени каралоо акциясына бейөкмөт, коомдук уюмдарды да кошууга үлгүрүшүптүр. Ошол саясий топтор эми жаштарды жана өз өлкөсү үчүн күйгөн жарандарды азгыруу аркылуу аларды саясатта курал катары колдонуп жатышат”, - деди Матраимов.
Ал ошондой эле журналисттик иликтөөдө айтылган маалыматтардын бардыгы жалган экенин белгиледи.
“Мен өзүмдүн ал иштерге тиешелүү эмес экенимди кайсы жерде болбосун далилдей алам. Жалган жалаа, калп маалыматтарды таратуу аркылуу мени курулай жаман көрсөтүү аракетинен улам коомчулукта азыр мага байланыштуу ар кыл пикирлер, уу-дуу кептер тарап кетти. Ушундан улам мен өз өлкөмө кайтып келүүнү чечтим. Мага байланышкан кандай суроо болсо, ошонун ичинде укук коргоо органдарына жооп берүүгө даярмын”, - деп сөзүн жыйынтыктаган.
Эске салсак, эки ЖМКнын Кытайдан аткезчилик жолу менен алып келинген товарлар жөнүндө биргеликте жасаган иликтөөсү коомчулукту дүрбөлөңгө салды. Андагы маалыматка караганда, Матраимовдордун үй-бүлөсү Хабибула Абдукадыр аттуу уйгур менен биргеликте бизнес жасап жүрүшкөн. Материал 10-ноябрда Стамбулда киши колдуу болгон Айэркен Саймаити берген маалыматтардын негизинде даярдалган. Иликтөөдө Саймаити өлөр алдында Кыргызстандын бажысындагы коррупция тууралуу маалыматтарды берүүгө үлгүргөнү айтылган.
