БИШКЕК, 16-ноя. — Sputnik. Өлкөдө билим берүү мекемелерине муктаждык болуп турганда, узакка курулуп жаткан курулуштар менен көйгөй болбошу керек. Мындай талапты премьер-министр Мухаммедкалый Абылгазиев Чүй облусундагы мектептин курулушу менен таанышуу учурунда тиешелүү мамлекеттик органдардын жетекчилерине койду. Бул тууралуу өкмөттүн маалымат кызматы билдирди.
Военно-Антоновка айылындагы жаңы мектептин курулушу 2012-жылы башталган, бирок иш алигиче бүтө элек. Ошол эле учурда курулуш иштери үчүн зарыл каражаттар жалданма компанияга өз учурунда бөлүнүп берилген. Ал гана эмес, курулуш учурунда чечүү үчүн кошумча каржылоону талап кылган башка маселелер да келип чыккан.
Ушундай эле жагдай Беловодское айылындагы 750 окуучуга ылайыкташкан жаңы мектепти салууда да түзүлүп, ал төрт жылдан ашуун убакытка созулган.
Өкмөт Архитектура, курулуш жана турак жай-коммуналдык чарба мамлекеттик агенттигинин жетекчилигин өз убагында чара көрбөгөндүгү, жалданма компанияларды тандоодогу шалаакылыгы үчүн сынга алды.
"Жалданма компанияларды тандоо маселесине кыйла жооптуу мамиле кылуу зарыл. Эгерде бир жалданма компания өзүнө жүктөлгөн милдетти аткара албаса, аны "кара тизмеге" киргизгиле. Мамлекет тарабынан каржыланган курулуш объектилерин алышпасын. Курулуштун мөөнөтү башынан белгиленет, мамлекеттик каражаттар өз убагында бөлүнөт, ал эми жыйынтык жок. Миңдеген адамдардын тагдыры көз каранды болгон ишке шалаакы мамиле кылууга болбойт", – деди ал.
Муну менен бирге премьер-министр социалдык жайларды куруу долбоорлорун ишке ашырууда жергиликтүү өз алдынча башкаруу органдарынан кыйла активдүүлүктү жана жоопкерчиликтүүлүктү талап кылды. Андан сырткары, премьер-министр бардык маселелерди ыкчам чечүүнү жана мектепти келерки окуу жылынын башына аяктоону тапшырды.
