БИШКЕК, 16-ноя. — Sputnik. Ташкентте Борбор Азия мамлекеттеринин тышкы иштер министрлери президенттердин жолугушуусуна болгон даярдыктарды талкуулашты. Бул тууралуу Тышкы иштер министрлигинин маалымат кызматы билдирди.
Ага ылайык, жолугушуу 15-ноябрда өткөн.
Өзбекстандын тышкы иштер министри Абдулазиз Камилов президенттердин бейформал жолугушуусу 29-ноябрда өтө турганын айтты.
Ал эми Борбор Азия мамлекеттеринин президенттеринин биринчи консультациялык жолугушуусу 2018-жылдын март айында Казакстанда болгон.
27-ноябрда Казакстандын президенти Касым-Жомарт Токаев мамлекеттик сапары менен Кыргызстанга келет. Ал эми 28-ноябрда Бишкекте ЖККУга мүчө мамлекеттердин башчыларынын саммити өтөт. Ага Кыргызстандын, Белоруссиянын, Казакстандын, Россиянын, Тажикстандын президенттери жана Армениянын премьер-министри катышат.
