БИШКЕК, 2-ноя. — Sputnik. Бишкек — Ош унаа жолунда үч унаа кагышып, тогуз киши жабыркаганын Жалал-Абаддын Жол кыймылы коопсуздугун көзөмөлдөө башкармалыгынан билдиришти.
Кырсык 30-октябрь күнү саат 23:00дөр чамасында болгон. Маалыматка ылайык, Бишкек — Ош унаа жолунун 374-чакырымында бараткан Mazda 626 үлгүсүндөгү автокөлүктүн айдоочусу рулун башкара албай каршы тилкеге чыгып, борбор калаага бара жаткан Honda Stepwagon менен кагылышкан. Ал Ош шаарына келе жаткан Honda Odyssey автокөлүгүн сүзүп барып токтогон.
Натыйжада Mazda 626 унаасындагы эки бала Кара-Көл шаардык ооруканасынын жандандыруу бөлүмүнө жаткырылган. Ал эми Honda Stepwagon машинасындагы үч киши аталган оорукананын хирургия бөлүмүндө, бир киши жандандыруу бөлүмүндө жатканы айтылды. Honda Odyssey автоунаасындагы эки адам жандандыруу бөлүмүнө, бир аял медициналык жайдын төрөтканасына жеткирилген.
Аталган факт Кылмыш жана жоруктардын бирдиктүү реестрине катталып, экспертиза дайындалды.
