БИШКЕК, 9-окт. — Sputnik. Жыл башынан бери жол кырсыгынан 526 киши каза болду. Мындай маалыматты ИИМдин Жол кыймылы коопсуздугун камсыздоо башкы башкармалыгынын жетекчиси Азамат Исраилов парламенттин жалпы жыйынында айтты.
Бүгүн депутаттар "Кыргыз Республикасынын Бузуулар жөнүндө кодексине өзгөртүүлөрдү киргизүү тууралуу" мыйзамдын долбоорун карашты. Ал биринчи окууга киргизилет.
ЖКККББнын башчысы депутат Дастан Бекешевдин суроосуна жооп берип жатып, жасалма номерлерди аныктоо боюнча атайын рейддер уюштурулуп жатканын жана бүгүнкү күнү мындай 421 факты аныкталганын билдирди.
Эл өкүлү бул абдан аз экенин айтып, азыр айдоочулардын 50 пайызы жасалма номер менен жүргөнүн белгиледи.
Ал эми Исраилов машиналарын каттатпай, мөөнөтү өтүп кеткендер боюнча 22 660 протокол түзүлгөнүн кошумчалады.
