СССРдин эл артисти Сүймөнкул Чокморов менен СССРдин эл сүрөтчүсү Тургунбай Садыковдун бул сүрөтү 1980-жылдардын башында Фрунзе (азыркы Бишкек) шаарында тартылган.
Ошол учурду 83 жаштагы скульптор Тургунбай Садыков мындайча эскерет:
"Анда жаш кез, маданият гүлдөп турган учур. Гапар Айтиев, Семён Чуйков өңдүү классиктердин көпчүлүгүнүн көзү тирүү болчу. Чокморов Фрунзедеги көркөм өнөр училищесин аяктап, кийин Ленинград шаарында билимин жогорулатып келген. Кыргызстандыктарга ал тасмалар аркылуу актер катары жакшы таанылган эмес беле. Андан сырткары, ал Сүрөтчүлөр союзунун мүчөсү болуп, көргөзмөлөргө көп барчу. Негизи Сүймөнкулдун мыкты эмгектери бар. Алардын көпчүлүгү азыр музейде турат. Ал өтө жөнөкөй инсан эле, узак убакыт кесиптеш катары жакын мамиледе болуп калдык", — деди Садыков.
Өз чыгармачылыгында актерлук менен сүрөтчүлүктү чогуу алып барган Чокморов "биринчи сүрөтчүмүн, анан гана актермун" деп айткан жайы бар. Ал эми Тургунбай Садыков 1991-жылы борбор калаада Улуттук көркөм өнөр академиясын ачкан. Анын алдында атайын мектеп, колледж, жогорку окуу жайы бар. Сүрөтчү аталган мекемени жетектеп, жаштарды тарбиялоо менен алек.
