БИШКЕК, 21-авг. — Sputnik. Жалал-Абад шаарынын борбордук базары өрттөндү. Бул тууралуу Өзгөчө кырдаалдар министрлигинин маалымат кызматы кабарлады.
Билдирмеге ылайык, өрт Жалал-Абад шаарындагы Бакиев жана Айтматов көчөлөрүнүн кесилишиндеги базарда 21-август күнү саат 00:33тө башталган.
"Кырсыктын кесепетинен жалпы аянты 2500 чарчы метрди түзгөн соода түйүндөрү жана күндөлүк турмуш-тиричиликке керектелүүчү товарлар күйүп кеткен. Жабыркагандар катталган жок", — деп жазылат маалыматта.
Өрттү өчүрүүгө ӨКМден жалпы алты бөлүм тартылган. Мындан сырткары, ага Тез жардам кызматынан эки бригада, Газ чарба кызматынан бир бригада, Экотехинспекциядан төрт кызматкер, ИИМден 170 кызматкер, ЖКККБдан эки экипаж тартылган.
Өрт түнкү саат 04:15те толук өчүрүлгөн. Келип чыгуу себеби жана келтирилген материалдык чыгымдар такталууда.
