БИШКЕК, 16-авг. — Sputnik. Ооруканага түшкөн Сапар Исаковду көрүү үчүн Улуттук госпиталдын №2 неврология бөлүмүнө анын жубайы Малика Арстанбекова келди. Бул тууралуу Sputnik Кыргызстан агенттигинин кабарчысы жеринен билдирди.
Анын айтымында, укук коргоо органдарынын өкүлдөрү Малика Арстанбекованы жолдошу жаткан палатага киргизбей жатат.
"Адвокат Замир Жоошевдин айтымында, Исаковду УКМКнын тергөө абагынын кызматкерлери кайтарып турат", — деди кабарчы.
Исаков 2018-жылы 5-июнда Бишкек шаарынын Биринчи Май райондук сотунун чечими менен тергөө амалдары аяктаганга чейин камакка алынган. Ал "Коррупция" беренеси боюнча айыпталууда. Исаков 2013-жылы президенттин аппарат жетекчисинин орун басары рангындагы тышкы саясат бөлүмүнүн жетекчиси кызматында турган кезде "Бишкек ТЭЦин модернизациялоо" долбоорун ишке ашырууда өзүнүн кызматтык абалынан пайдаланганы айтылууда.
