БИШКЕК, 14-авг. — Sputnik. УКМКнын "Альфа" кызматынын жоокери Үсөнбек Ниязбековду өлтүрүүгө шектелген киши кармалды. Бул тууралуу Sputnik Кыргызстан агенттигине жабырлануучу тараптын адвокаты Кайрат Загибаев билдирди.
Ал ошондой эле шектүү ким экени, ал кимдер тарабынан кармалганы тууралуу толук маалымат кийинчерээк берилерин айтып, тергөө иштери башталганын кошумчалады.
7-августта УКМКнын атайын даярдыктагы жоокери Алмазбек Атамбаевдин Кой-Таштагы үйүнө басып кирүү учурунда Ниязбеков көкүрөк тушка ок жеп каза болгон. 8-августта мурдагы президент багынып берип, суракка алып келинген. Ушул эле күнү кечинде Атамбаевдин тарапташтары "Ала-Тоо" аянтына чогулуп, аларды укук коргоо органдары күч менен кубалап тараткан. Эки күндөгү чыр-чатактан жалпысынан 136 киши ар кандай жаракат алган.
Ал эми Атамбаев 26-августка чейин УКМКнын убактылуу кармоо жайына киргизилген.
