БИШКЕК, 9-авг. — Sputnik. ЕАЭБдин ички рыногундагы тоскоолдуктар жоюлушу керек. Бул тууралуу премьер-министр Мухаммедкалый Абылгазиев Чолпон-Атада өтүп жаткан Евразиялык өкмөттөр аралык кеңештин жыйынында айтты.
Премьер өз сөзүндө көйгөйдү Евразиялык комиссиянын укугун кеңейтүү менен чечүүгө болорун белгиледи.
"Тилекке каршы, ички рынокто ушу кезге чейин чектөөлөр бар. Мындан улам тоскоолдуктарды жоюу боюнча чара көрүп, биримдиктин толук кандуу иштеши үчүн талаштуу маселелерди тез арада ыкчам чечүү максатында комиссиянын укуктарын кеңейтүү зарыл", — деди өкмөт башчы.
Премьер-министр кеңештин тар чөйрөдөгү жолугушуусу да ушул маселеге арналганын белгиледи.
"Биз ЕАЭБ ортосунда бажы төлөмдөрүн бөлүштүрүүнүн ченемдерин, алкоголь рыногун жана жалпы финансы рыногун жөнгө салууну талкууладык. Аны 2025-жылы ишке киргизүү каралган", — деди өкмөт башчы.
Евразиялык өкмөттөр аралык кеңештин жыйыны Чолпон-Ата шаарында өтүп жатат. Жыйынтыгы менен бир катар документтерге кол коюлмакчы.
