БИШКЕК, 31-июл. — Sputnik. АКШ бийлиги Кыргызстандын жарандары үчүн студенттик жана жумушчу визаларынын наркын төмөндөтөт. Бул тууралуу АКШнын Кыргызстандагы элчилигинен кабарлашты.
Ага ылайык, мындай макулдашууга АКШнын мамлекеттик катчысынын жардамчысынын орун басары Жонатан Хениктин Кыргызстанга болгон иш сапарынын жүрүшүндө жетишти. Өз кезегинде Кыргызстандын Тышкы иштер министрлиги Борбор Азиядагы Америка университетинде окуган чет элдик студенттерге виза берүүнү жеңилдетүүгө макул болгон.
Бүгүнкү күнү кыргызстандыктар үчүн визанын баасы категориясына жараша 160 доллардын тегерегинде. Андан сырткары, визаны алууда кошумча 25 доллардан 45 долларга чейин кошумча төлөнүшү ыктымал. Визанын жаңы баасы тийиштүү процедуралар аяктагандан кийин так белгилүү болот. Өзгөртүүлөр 7-августтан тарта күчүнө кирет.
