БИШКЕК, 30-июл. — Sputnik. Улуттук коопсуздук мамлекеттик комитетинин маалымат кызматы Эсеп палатасынын башкы инспектору А.Н. аттуу жаран кайсы иш боюнча шектелип жатканын билдирди.
УКМКдан билдиришкендей, инспектор УКМКнын тергөө башкармалыгынын токтому менен Айлана-чөйрөнү коргоо жана токой чарбасы мамлекеттик агенттигинин борбордук аппаратынын кызматкерлерине 2019-жылдын 1-январынан тарта май айына чейинки маяна жана башка төлөмдөрдү текшериши керек болчу. Андан сырткары, кызматтык автоунааларды тейлөө үчүн бөлүнгөн акчалардын негиздүүлүгүн текшерип, аудит жүргүзүүсү керек болчу.
"Мамлекеттик инспектор аудит боюнча жасалма акты түзүп, бюджеттик каражаттардын сарпталышы боюнча кетирилген финансылык мыйзам бузууларды билип туруп жашырып койгон", — деп айтылат маалыматта.
Эсеп палатасынын башка инспектору кошумча текшерүү жүргүзүп, жасалма корутунду чыгарылганын аныктаган.
Эсеп палатасынын башкы инспекторуна Кылмыш-жаза кодексинин 320-беренеси ("Кызмат абалынан кыянаттык менен пайдалануу") боюнча айып тагылууда.
