БИШКЕК, 29-июл. — Sputnik. Бишкекте катталган эки өлүмгө шектелген адамдар кармалды. Окуялар июндун ортосунда жана июлдун башында болгон. Бул туурасында шаардык ИИББдин маалымат кызматы билдирди.
14-июнда болжол менен саат 21:30да Москва жана Трудовой көчөлөрүнүн кесилишинде кыйнап өлтүрүлгөн 30-35 жаштагы кишинин сөөгү табылган.
Милиция окуя тууралуу күбөлөрдөн сураштырган. Болжолдуу маалыматтар боюнча, Б.Н. ал күнү бир нече адам менен спирт ичимдигин ичкен. Укук коргоо органдары шектүү катары 38 жаштагы Ж.Н. аттуу кишини кармашкан. Учурда ал убактылуу тергөө абагына киргизилип, тергөө иштери жүрүп жатат.
Экинчи өлүм 7-июлда катталган. Анда өтүп бара жаткандар саат 07:46та Чыгыш-5 кичи районунун өйдө жагындагы өндүрүштүк жайдагы түтүктөрдүн арасынан кишинин сөөгүн табышкан. Милиционерлер маркумдун денесинде бычактын издери бар экендигин билдиришкен.
Факт Кылмыш жана жоруктардын бирдиктүү реестрине катталган. Бул учурда дагы милиция күбөлөрдүн айтуусу боюнча шектүүнүн изине түшкөн. Бүгүн кылмышка шектүү деп 26 жаштагы Д.Р. кармалып, убактылуу тергөө абагына киргизилгени айтылды.
