БИШКЕК, 16-июл. — Sputnik. Казакстанда Элдик банктын эки жүздөн ашуун кардары хакерлердин тузагына түштү. Бул тууралуу өлкөнүн Кибер чабуулду иликтөө жана анализдөө борборунун маалымат кызматы билдирди.
Маалыматка караганда, хакерлер homebank.kz тиркемеси аркылуу бир жумадан бери чабуул жасап жатат.
"Бул жумада эле 210 кардар хакерлердин homeebank.com деген жасалма тиркемесине ишенип, сыр сөзүн берип алган. Аны менен катар эле алдангандардын саны улам көбөйүп жатат. Ушул эле команда Казакстандан сырткары Грузиядагы бир банкка да чабуул койгон", — деп айтылат Кибер чабуулду иликтөө жана анализдөө борборунун маалыматында.
Банктын кардарларына жасалган чабуулда Түркиянын ip-дареги жана жабдыктары колдонулганы белгиленет.
Шылуундар элди өзүнө тартуу үчүн автоунаа, смартфон жана башка баалуу байгелерди ойнотууда. Мындан улам алар азгырылып, чыныгы интернет-русурска окшош Homeybank.com, Hometbank.com жана homeebank.com деген сайттарга кирип кетүүдө.
