БИШКЕК, 9-июл. — Sputnik. Instagram социалдык тармагы бири-бирин кодулагандарды тескөө үчүн жаңы функцияны киргизди. Бул туурасында компания расмий жарыялаган блогунда маалымдады.
Билдирмеге караганда, Instagram жасалма интеллектинин жардамы менен видео, сүрөттөрдүн астына бирөөнү басынтып, сөгүнүп-сагынып жазган комментарийлерди аныктайт. Эгер акаарат келтирүү катары бааланса, комментарий жазып жатканда "Чын эле бул контентке жарыялоону каалайсызбы?" деп эскертүү берилет.
Мындан сырткары, акаарат келтирген комментарийлерди жашырып коюу үчүн "Чектөө" деген функция да пайда болот.
Муну иштеп чыккандар бири-бирин соцтармакта кодулап, реалдуу жашоодо чыр чыгып кетишинен оолак кылууга аракет жасоодо. Жаңы опция жакынкы күндөрү ишке кирмекчи.
