БИШКЕК, 3-июл. — Sputnik. Бишкектеги ЦУМдун жанында ынды кара кишини эс-учун жоготкуча сабап кетишкенин Sputnik Кыргызстан агенттигине жабырлануучунун кесиптеши Виктория Хан билдирди.
Анын айтымында, окуя 2-июлда болжол менен саат 16.00дө болгон.
"Окуяны көргөн аялдардын бири кесиптешим ЦУМдан бир белгисиз адам менен чыкканын айтып берди. Ал тигини колунан бекем кармап, кое бербей койгон. Ортодо чыр чыккан. Белгисиз адам аны бетке уруп жиберген, кесиптешим соккудан улам жыгылып, башы менен асфальтка тийген. Азыр ал реанимацияда комада жатат. Дарыгерлер эч нерсе дей элек, анализдердин жыйынтыгы чыга элек", — деди ал.
Ал эми "Короче" Telegram-каналында окуядан кийинки абал чагылдырылган видео тарады. Кадрларда ынды кара киши жерде жатканын, айланасынын баары кан экенин жана адамдар ага жардам берүүгө аракет кылып жатышканын көрүүгө болот.
Бишкек милициясы маалыматты тастыктады. Жабырлануучунун тек-жайы такталып, Нигериянын жараны экени аныкталган. Факт 138-берененин ("Ден соолукка оор залака келтирүү") негизинде Кылмыш жана жоруктардын бирдиктүү реестрине каттоого алынып, шектүү изделип жатат.
