БИШКЕК, 3-июл. — Sputnik. Социалдык тармактарда Кочкор районунун орто мектебин аяктаган окуучу кыздын ката менен басылган аттестатынын сүрөтү жарыяланды.
Анда орус тилинде жазылган бетинде "окончила среднюю реднюю школу" деп турат.
Билдирүү менен ЖК депутаты Элвира Сурабалдиева да Twitter баракчасынан бөлүшүп, "Кудайбердиева күздө кызматынан кетет окшойт" деп жазган.
Чувствую что минобраз Кудайбердиева покинет свое кресло осенью. А байкешка который ее крышует - враг Кыргызстана, которому наплевать на родину, его только $$ волнуют. 😡 pic.twitter.com/uK6ZGTh9ya
— Эльвира Сурабалдиева (@ElviraSur) 3 июля 2019 г.
Билим берүү жана илим министрлигинин маалымат кызматы Кочкор районунда берилген аттестаттардан ката кеткенин тастыктады.
"Басмаканага жөнөтүлгөн акыркы вариантта мындай ката жок болчу. Негизи жыл сайын эле басмакананын катасы менен чыккан документтер болот. Муну мектептин директорлору дыкат текшериши керек эле. Аттестаттарды толтуруп жаткандар да карашы керек болчу", — дешти министрликтен.
Алардын айтымында, "среднюю реднюю" деген ката 10 аттестаттан табылган. Бешөө алмаштырылды, калганын бүгүн алмаштырып берүүнү убадалашты.
Маалымат кызматынын билдиргенине караганда, аттестаттар дайыма тийиштүү көлөмдөн көбүрөөк басылат.
Бул аттестатта кеткен ката биринчи учур эмес. Буга чейин "жөнүндө" деген сөздөгү "н" тамгасы "ң" болуп өзгөрүп калган. "Он окончил школу" деп жазылып, кыз бала эркекке айланып кеткен учур да болгон.
