БИШКЕК, 19-июн. — Sputnik. Кыргызстанда мамлекеттик инвестицияны башкаруу боюнча жобо кабыл алынды. Ага премьер-министр Мухаммедкалый Абылгазиев кол койгонун өкмөттүн маалымат кызматынан кабарлашты.
Бул документтин негизги максаты — мамлекеттик инвестициялык долбоорлордун ишке ашышын жеңилдетүү жана жакшыртуу.
Аталган жобо аткаруучу агенттиктер, тиешелүү органдар жана кызыкдар тараптар үчүн инвестициялык долбоорлорду талдоо, баа берүү, ишке ашыруу боюнча бирдиктүү система болуп эсептелет.
"Документтин жардамы менен инвестициялык долбоорлорду ишке ашыруудагы бюрократиялык тажатма иштер токтотулат", — деп айтылат билдирүүдө.
Бул жылы мамлекеттик инвестицияга сырттан салым кошкондордун катарына Кытай, Германия өлкөлөрү, Дүйнөлүк банк, Араб координациялык тобу, Евразия реконструкция жана өнүктүрүү банкы, Азия өнүктүрүү банкы сыяктуу уюмдар кирет.
Каражат негизинен транспорт, энергетика, айыл чарба, саламаттык сактоо, билим берүү жаатындагы ири долбоорлорго жумшалат.
