БИШКЕК, 8-июн. — Sputnik. KLM авиакомпаниясынын инженерлери Делфт технологиялык университети менен бирге жаңы учактын долбоорун иштеп чыгышты. Анда жүргүнчүлөр учактын канатынын ичине отурат. Бул тууралуу Interesting Engineering басылмасы жазды.
Үч бурчтуу келген самолеттун формасы абада учууда ыңгайлуу болуп, майды дагы үнөмдөйт. Аба кемеси латынча V тамгасына окшош болгондуктан Flying-V деген наам ыйгарылды. Эгер долбоор ишке ашып калса, бул жүргүнчүлөр канаттан орун алган алгачкы самолет болуп калат.
Инженерлер учурда аба кемесинин прототибин жасап жатышат, ал ушул күздө коомчулуктун назарына сунушталат. Ал эми божомол боюнча массалык түрдө 2040-2050-жылдары колдонула баштайт. Учактын канаттарында жүргүнчүлөрдүн орундуктарынан тышкары май куюучу бак жана жүк сала турган атайын жай дагы орун алат.
