Маданият министрлигин башкаруу кыйын. Анткени ал жакта генийлер, СССРдин эл артисттери, чоң интеллектуалдар иштейт. Мындай пикирин Садык Шер-Нияз Sputnik Кыргызстан радиосунун эфиринде маек куруп жатып билдирди.
Анын айтымында, мамлекетке дух бере турган бул — маданият.
"Эгерде мыкты кинолор чыкса, мыкты театралдык оюндар коюлса, мыкты китептерди окусак эл митингдерге чыкпайт эле. Бүгүнкү күндө руханий жардылыктан улам жаштардын баары бири депутат, бири министр болом деп калды. Маданиятты көтөрүп, эл театрга, киного каттап, музыка угуп, китеп окуп калса, азыркы өсүп келе жаткан муундар саясаттан башка дагы жакшы кесиптер бар экенин билмек. Ошондо чыныгы руханий жашоо менен жашамакпыз. Азыр болсо руханий жан дүйнөсүнүн жакырлыгынан эл дайыма кабатыр, дайыма бир нерсе жетпегендей жашоосуна нааразы, кимдир бирөөгө ачуулуу. Мындай көрүнүш өлкөнүн экономикасына дагы кедергисин тийгизип жатат. Биз эгемендүү мамлекет болгондон бери маданият тармагына итке сөөк ыргыткандай эле мамиле жасап келе жатабыз. Жок, тескерисинче, каржыны ушул тармакка салып, олуттуу көңүл буруп, элдин жан дүйнөсүн тойгузбасак, экономика көтөрүлбөйт", - деди Садык Шер-Нияз.
Эл өкүлү жалпы коомчулукту да жер-жерлерде маданият тармагын өнүктүрүүгө өз салымын кошууга чакырды.
