БИШКЕК, 15-май — Sputnik. Mercedes-Benz үлгүсүндөгү унаада милициянын формасын кийген киши алдыңкы орунга отургузуп койгон наристеге коопсуздук курун таккан эмес. Күбөнүн видеосу Telegram-каналындагы "Короче" тайпасына жарыяланды.
Маалыматка караганда, видео шаршемби күнү, 15-майда, саат 07:45тер чамасында Токмокто тартылган.
Айдоочу аны видеого тартып жатканын көрүп, өзү коопсуздук курун тагынган. Бирок наристе алдыңкы орунда турган бойдон кете берген.
Чүй облустук ИИББдин маалымат кызматынан кабарлашкандай, видео изилденип жатат. Формачан кишинин ким экени жана иштеген жери такталууда. Аныкталгандан кийин ага чара көрүлөрү белгиленди.
Белгилей кетсек, 12 жашка чейинки балдарды унаанын алдыңкы орунуна отургузуу үчүн автоотургуч колдонуу керек. Ошондой эле коопсуздук куру тагылышы зарыл.
