БИШКЕК, 7-май — Sputnik. Бишкекте "Өлбөс полк" акциясы менен Жеңиш күнүнүн 74 жылдыгында бир катар көчөлөргө чектөө киргизилет. Бул тууралуу Sputnik Кыргызстан агенттигине Жол кыймылы коопсуздугун камсыздоо башкармалыгынан билдиришти.
Жүрүштүн катышуучулары Масалиев менен Байтик баатыр көчөлөрүнүн кесилишинде саат 09:00дө чогулушат. Ал эми саат 10:00дө Абдрахманов көчөсү, андан ары Фрунзе менен басып, "Жеңиш" аянтына барышат.
ЖКККБдан маалымдашкандай, саат 09:00дөн тарта төмөнкү көчөлөрдүн бир бөлүгү жабылат:
Токомбаев көчөсүнүн Абрахманов ("Жеңиш" паркы) менен кесилишкен бөлүгүнө чейин;
Абдрахманов көчөсүнүн Токомбаевден Фрунзеге чейинки бөлүгү;
Фрунзе көчөсүнүн Шопоковго чейинки бөлүгү.
Мындан сырткары, Шопоков, Фрунзе, Ибраимов көчөлөрү менен Чүй проспектиси менен чектешкен аймакка дагы чектөө киргизилет.
ЖКККБ жарандарды альтернативдүү жолдорду тандоого чакырат.
