Түндүкэлектр" ишканасынын РЭС бөлүмүнүн жетекчиси үчүнчү парасын алып жаткан жеринен кармалды. Бул туурасында Экономикалык кылмыштуулукка каршы күрөшүү боюнча мамлекеттик кызматтын басма сөз бөлүмүнөн кабарлашты.
Буга чейин кыргызстандык жаран Финансы полициясына аткаминер кызмат абалынан пайдаланып, 5000 сом талап кылып жаткандыгын айтып кайрылган.
"Акчаны техникалык шарттарды жөндөө үчүн документ алууга талап кылган. Көп кабаттуу үйдөгү кир кургатууга бөлүнгөн жайдагы трансформаторду көчөгө алып чыгуу керек болгон. Фактыларды топтоо боюнча бир катар атайын тергөө иш-чаралары болгон жана акча талап кылгандыгы боюнча далилдер топтолгон", — деп айтылат маалыматта.
"27-мартта беш миң, андан эки күн өткөн соң 10 миң сом алган. Ал эми 26-апрелде дагы 35 миң сом алууга ниеттенип жаткан. Бул ар бир параны Финансы полициясы көзөмөлдөп, видео, фотого тартып алып турган", — деп билдирген маалымат кызматы.
Акчанын үчүнчү бөлүгүн берип жатканда аткаминер колго түшүрүлгөн. Учурда тергөө иштери жүрүп жатат.
