БИШКЕК, 29-апр. — Sputnik. "Золотая корона — денежные переводы" кызматы 16-апрелден тарта Кыргызстандагы коммерциялык банктарга которулган акча 100 миң рублден (108 миң сом) ашпашы керек деген чектөө койгонун билдирди. Мындай маалыматты Кыргызстандын Улуттук банкы таратты.
Чектөө Россиянын Борбордук банкы тарабынан 16-апрелден тарта киргизилген. Мындан соң бир катар коммерциялык банктар өздөрүнүн сайттарына Россиядан келген акчаларга чектөө коюлгандыгын маалымдады.
"Эми кардар календарлык 30 күндө бир нече ирет которгон жалпы сумма 100 миң рублден ашпашы керек", — деп айтылат маалыматта.
Улуттук банктын баалоосуна таянсак, жеке тараптар которгон акчанын суммасы орточо эсеп менен алганда 400-500 долларды түзөт. Ал эми РФте иштеген жарандардын айлыгы бир нече тараптардын баалоосуна караганда, 500-600 доллардын тегерегинде.
"Бул системада киргизилген чектөөлөр эмгек мигранттарынын которгон акчасына таасирин өтө деле тийгизбейт. Улуттук банк товарлары же көрсөткөн кызматы үчүн акчаларын аталган система менен жиберип жана кабыл алып иштеген ишкерлерге таасирин тийгизерин танбайт", — деп айтылган маалыматта.
Кыргызстандын Банктар кеңешинин төрагасы Анвар Абдраев бул чектөө башка системаларга киргизилген же киргизилбегендигин азырынча билбей тургандыгын айтты.
"Ведомости" үч маалымат булагына таянып, чектөөнү Россиянын Борбордук банкы койгондугун айтты.
Мындай жол менен көмүскө экономика, анын ичинде каттоосу жок ишкерчилик менен күрөшүү экендигин басылманын маалымат булактарынын бири айтып берген. Дагы бирөө базарларда соода кылган чет өлкөлүк жарандар аталган система менен алган товарларынын акчасын жөнөтөөрүн, алардын жеке ишкер катары каттоосу жок деген пикирин айткан.
"Мындай которууларда адамдар адатта Россияга товар жөнөтүүнү пландаган келишимдер аркылуу төлөшү керек. Ал эми алар бул жол менен ишкерлик кылгандыгын жашырып коюшат. Андан сырткары, банктардын эсебине валюталык көзөмөлдү орнотуудагы келишимдерден четтеп жатышканын регулятор билдирди", — деп белгилеген басылма.
Былтыр жарыяланган россиялык маалыматтарда Россиядан Кыргызстанга 2,4 миллиард доллар, ал эми кыргызстандык маалыматтарда 2,6 миллиард доллар экени айтылган.
