БИШКЕК, 24-апр. — Sputnik. Америкалык рэпер, кийим-кечек дизайнери жана тележылдыз Ким Кардашяндын жолдошу Канье Уэст "Чиркөө кийимдери" деген аталыштагы коллекциясын сатыкка алып чыга коем деп катуу сынга кабылды. Бул тууралуу The Independent басылмасы жазды.
Окуя мындайча болду. Рэпер ачык асман алдына эле чатыр тиге коюп, "Кудайга ишен", "Иисус келе жатат", "Ыйык дух" деген диний сөздөр жазылган футболка жана байпактарды сатыкка чыгарган.
"Бирок элди кийимдеги сөздөр эмес, алардын баасы чочутту. Мисалы, футболкалар 225 доллар болсо, кадимки байпактар 50 долларга бааланган", — деп айтылат макалада.
Дизайнердин кийимине буга чейин дагы нааразычылыктар болгон. 2018-жылы АКШнын баскетбол боюнча курама командасына Уэстке таандык Yeezy брендинин бут кийимдерин оюн учурунда кийүүгө тыюу салышкан. Команда жетекчилиги бут кийимдин артындагы жарык чагылдыруучу элементтер оюнга тоскоол болот деп чечкен.
