БИШКЕК, 17-апр. — Sputnik. Кыргызстанда дарыгерлер чет өлкөгө жана менчик клиникаларга кетип калып жатат деди Жогорку Кеңештин депутаты Альфия Самигуллина. Бул маалыматты эл өкүлү "Жеке же мамлекеттик медицина. Кыргызстандагы бейтаптардын коопсуздугу жөнүндө" деп аталган тегерек столдо сүйлөп жатып айтты.
Анын пикиринде, өлкөдөгү медицинанын деңгээли врачтарга гана байланыштуу эмес, нааразы болуп жаткандар да жасаган мамилесин өзгөртүшү кажет.
"Саламаттыкты сактоо тармагына финансылоонун 30 пайызы жетпей калат. Бул базалык зарыл делген керектөөнүн муктаждыгы. Мамлекеттик ооруканалардагы орточо айлык акы 8-12 миң сомдун тегерегинде. Ал эми алардан каны-жаныңды берип иште деп талап кылып жатабыз. Менчик клиникаларда жакшы адис 500дөн 1000 долларга чейин айлык алат", — деди ал.
Тегерек столдо жеке медициналык ишмердүүлүккө байланышкан мыйзам долбоору талкууланды. Анда менчик клиникалардын лицензиялык көзөмөлүн жана саламаттыкты сактоо тармагынын бирдиктүү системасын өнүктүрүү боюнча кеп болду.
