БИШКЕК, 27-мар. — Sputnik. Кыргызстан жана Россиянын ректорлорунун I форумунда ОшМУ менен Россиянын ЖОЖдорунун ортосунда кызматташуу боюнча 12 меморандумга кол коюлду.
Алгач Казань федералдык университетинин ортосундагы өз ара алака боюнча меморандум түзүлдү.
Буга чейин ОшМУ Россиянын 33 жогорку окуу жайы менен кызматташып, окутуучулар, студенттер, магистранттар академиялык мобилдүүлүк программаларынан өтүп келген.
Бүгүнкү форумдун алкагында жалпысынан 12 жогорку окуу жайы менен кызматташуу келишимдерине кол коюлуп, кызматташуунун алкагы кеңейди.
Учурда ОшМУнун 18 студенти, алардын ичинен 4 магистранты Россиянын ЖОЖдорунда академиялык мобилдүүлүктөн өтүп жатышат.
Эске салсак, бүгүн, 27-мартта, "Илим жана билим берүүнүн өнүгүүсү - келечекке салынган инвестиция" аталышындагы Кыргызстан жана Россиянын ректорлорунун I форуму өтүүдө.
Ага президент Сооронбай Жээнбеков катышып, Кыргызстан үчүн келечектүү илимдин багыттары тууралуу айтып берген.
Форумга Россиянын илим жана жогорку билим берүү министри Михаил Котюков, Россиянын агартуу министри Ольга Васильева, Россиялык ректорлор союзунун президенти Виктор Садовничий жетектеген 40 жогорку окуу жайдын өкүлдөрү келген.
Ал эми Кыргызстан тараптан билим берүү жана илим министри Гүлмира Кудайбердиева, КРдин жогорку окуу жайларынын ассоциациясынын төрагасы Абдылда Мусаев баштаган 31 ЖОЖдун ректорлору катышууда.
Жалпылап айтканда, жыйынга эки тараптан 70ке чукул ректор катышты.
