БИШКЕК, 11-мар. — Sputnik. Президент Сооронбай Жээнбеков соттордун XI съездинде сүйлөп жатып, Казакстандагы санариптешкен сот системасын мисал келтирди.
Мамлекет жетекчиси санариптешүү — бул кагазсыз документ менен иштөө экенин эскертип өттү. Жээнбековдун айтымында, Кыргызстанда ушул процесс, иштин өзүн кароо да кагаз форматында жүрөт.
"Керектүү документти издөөгө бир нече күн сарпталат. Каттоо кызматына, ИИМге сурам кагаз жүзүндө жөнөтүлөт. Кээде мындай жазышуу жылдап жүрөт экен. Мунун баарын электрондук форматка өткөрүү татаал эмес", — деди президент.
"Бизге "санариптешкен" соттор керек. Мисалы, Казакстанда арыздын, доо арыздардын 91 пайызы электрондук форматта келет. Биздин эмнебиз кем?" — деди өлкө башчы.
Жээнбеков сот жыйындарын онлайн өткөрүү керектигин, бул сот бийлигине болгон ишенимди жогорулатарын кошумчалады.
