БИШКЕК, 9-мар. — Sputnik. Бүгүн кыргызстандыктар Сауд Аравиянын Эр-Рияд шаарында өтө турчу Camel Fest фестивалынын алкагында "Көчмөндөр ааламы" фестивалында өнөрүн тартуулайт. Бул туурасында иш-чараны кыргыз тараптан чогуу уюштуруп жаткан Бүткүл дүйнөлүк этнооюндар конфедерациясынын маалымат кызматы кабарлады.
Аталган конфедерациянын Facebook баракчасында иш-чаранын салтанаттуу ачылышы саат 20:00дөн 22:00гө чейин боло турганы айтылат.
"Кечээ артисттер, каскадерлор жана спортчулар фестивалга карата башкы даярдыктан өтүштү. Алар лагерге келген күндөн тарта эртеден кечке чейин иш-чарага камынып жатышты", — деп айтылат билдирмеде.
Camel fest фестивалына Кыргызстандан топоз, тайган, бүркүттөрдү алып кетишкен.
Ошондой эле катышуучулардын тамак-ашы, жаткан жери беленделип, мал-жаны багылуу болот. Кеткен чыгымдын баарын уюштуруучулар көтөрмөкчү.
