БИШКЕК, 19-фев. — Sputnik. Юрист Кайрат Осмоналиев депутат Тазабек Икрамовго "Билим берүүнүн отличниги" төш белгиси мыйзамсыз берилгенин айтып, бул боюнча Коопсуздук кеңешинин катчысына кат жолдоду. Sputnik Кыргызстан агенттигине Осмоналиев маалыматты тастыктап берди.
Анын айтымында, катта жалпысынан Билим берүү жана илим министрлигиндеги мыйзам бузуулар тууралуу айтылган. Анын ичинде министр эл өкүлүнө сыйлык берүүдө жобону эске албаганы да белгиленген.
"Негизи бул төш белгини ала тургандардын тизмеси министрликтин сайтына бир ай мурун илиниши керек. Ноябрь, октябрь айыныкын карасам, депутаттын аты-жөнү жок экен. Мындан сырткары, жобого ылайык, төш белги илимий-педагогикалык эмгек стажысы жалпысынан 20 жылдан кем болбогондорго берилет. Бул мыйзамды одоно бузуу. Тымызын эле берип койгон. Анын үстүнө Тазабек Икрамов билим берүү боюнча профилдик комитеттин мүчөсү. Бул жерде коррупция да болушу мүмкүн", — деди юрист.
Осмоналиевдин Коопсуздук кеңешинин төрагасына жолдогон катын толугу менен төмөнкү документтен окуй аласыздар.
Эске салсак, 2018-жылдын декабрь айында Жогорку Кеңештеги "Өнүгүү — Прогресс" фракциясынын депутаты Тазабек Икрамов "Билим берүүнүн мыктысы" төш белгисин алган. Өмүр баянында жазылгандай, ал 1998-2000-жылдары Кыргыз мамлекеттик дене тарбия жана спорт институтунун Жалал-Абад облусундагы филиалында дене тарбия мугалими болуп иштеген. Депутаттын сыйлыгы эл арасында бир топ нааразылыкты жараткан.
"Билим берүүнүн мыктысы" сыйлыгын кантип алууга болору тууралуу Sputnik агенттиги материал даярдаган.
