Көкпар эрежесин киргиздик! Казакстан кыргыз тараптын сынын кандай кабыл алды

БИШКЕК, 19-фев. — Sputnik. Казакстандын Көкпар федерациясынын президенти Мухтархан Дильдабеков көк бөрүгө киргизилген эл аралык эреже тууралуу кыргыз тараптын сынына жооп берди.

Белгилей кетсек, 14-февралда Астанада Дүйнөлүк көкпар ассоциациясынын жыйыны өткөн. Анда тай казансыз, муляж менен ойноого ыктаган көкпар оюнунун эл аралык эрежеси кабыл алынган. Ал отурумга Кыргызстандан расмий өкүл барган эмес. Бирок кыргыз тарап ал бекитилген эрежеге каршы экенин билдирип, андай оюндарга катышуудан баш тартарын айткан.

Ал эми Казакстандын Көкпар федерациясынын президенти эмнеге мындай эреже кабыл алынганына түшүндүрмө берген.

"Биз 15-20 жылдан бери тай казан менен ойноп келдик. Эми жаңы эрежелер кабыл алынды, тай казандын ордуна тегерек чийин колдонулат. Ошондой эле жаныбарларды коргоо боюнча эл аралык уюмдун талаптарын колдоп муляж тартуу чечилди", — деп айткан Дильдабеков.

Аталган отурумга Казакстан, Өзбекстан, Тажикстан, Монголия, Түркия, Венгрия, Кытай, Россия жана Афганистан болуп тогуз өлкө катышкан. Көкпардын эрежесин 8 өлкө колдоп, бир гана Россия арсар пикирин билдирген.

Көкпар көк бөрүдөн эмнеси менен айырмаланат? Эрежелерди салыштырып көрүү үчүн бул жакка баш багыңыз.