БИШКЕК, 1-фев. — Sputnik. Кыргызстан жылдын аягына чейин ар бир айыл жана андагы мектептерди интернетке кошот. Бул тууралуу премьер-министр Мухаммедкалый Абылгазиев Алматы шаарында өтүп жаткан "Глобализация доорундагы санариптик күн тартип 2.0." форумунда айтты.
Анын пикиринде, бул форум санариптик трансформация багытындагы жасалып жана пландалып жаткан иштерди талкуулап, пикир алышууга жакшы мүмкүнчүлүк түздү.
Технологиялык стартаптарды өнүктүрүп, жаңы маалымат технологияларын өздөштүрүү үчүн "Санариптик Кыргызстан" деген аталыштагы беш жылдын концепциясы иштелип чыкты. Анын максаты — мамлекеттик кызмат көрсөтүүлөрдү сапаттуу санариптештирип, элдин бул жааттагы билимин көтөрүү.
Концепциянын алкагындагы долбоорлор:
- Digital CASA — Kyrgyzstan ири масштабдуу долбоору башталууда;
- Мамлекеттик органдар ведомстволор аралык электрондук кызматташуу системасына кошулуп жатат;
- Мамлекеттик электрондук кызматтардын бирдиктүү порталы ишке киргизилди;
- Жылдын аягына чейин бардык айылдарды жана мектептерди интернетке кошуу. Бул аймак тургундарына мамлекеттик кызматтардын электрондук түрүн колдонууга шарт түзөт;
- Жылдын аягына чейин салык төлөө процедураларын электрондоштуруу. Бул мамлекеттик бюджеттин киреше бөлүгүн көбөйтүп, көмүскө экономикага бөгөт коет;
- Соттук реформалардын алкагында 1-январдан тарта "Кылмыштардын жана жазыктардын бирдиктүү реестри", "Эреже бузуулардын бирдиктүү реестри" автоматташкан маалыматтык системасы ишке киргизилди;
- Киберкоопсуздук стратегиясын иштеп чыгуу процесси аягына чыгып калды.
