БИШКЕК, 30-янв. — Sputnik. Жаштар арасында социалдык видеороликтердин сынагы өтө турганын Жаштар иши, дене тарбия жана спорт боюнча мамлекеттик агенттиктин маалымат кызматы кабарлады.
Конкурска Кыргызстандын 14 жаштан 28 жашка чейинки жарандары катыша алат.
Ар бир катышуучу конкурстун тематикасына ылайык болгон бирден гана видеоролик тапшырышы шарт.
Конкурс төмөнкү багыттар боюнча өткөрүлөт:
- үй-бүлөлүк баалуулуктарды бекемдөө жана өнүктүрүү;
- маанилүү социалдык институт катары заманбап үй-бүлөнүн беделин жогорулатуу (балдарга карата зомбулукту жана жашы жете электердин арасындагы эрте никеге туруунун алдын алуу);
- экологиялык маданияттуулукту жана экологиялык аң-сезимди калыптандыруу;
- ыктыярчылык кыймыл.
Конкурстук эмгектерди кабыл алуу 15-мартта аяктайт.
Конкурстук иштер Мамагенттиктин коомчулук менен байланыш бөлүмүндө электрондук форматта Бишкек шаары, Тоголок Молдо көчөсү, 17 дареги боюнча же sport.gov.kg@gmail.com электрондук дарегинде кабыл алынат.
Конкурстун жеңүүчүлөрү упайлардын саны аркылуу аныкталып, эң көп балл чогулткандар грамота жана акчалай сыйлыкка ээ болушат:
- 1 орун – 70 миң сом;
- 2 орун – 50 миң сом;
- 3 орун – 35 миң сом;
- 4 орун – 25 миң сом;
- 5 орун – 20 миң сом.
Кошумча маалымат менен шилтемеси аркылуу таанышсаңыздар болот.
