Депутаттар ОСАГО полисин алууну 2021-жылга чейин жылдырууну сунуштап жатат

БИШКЕК, 21-янв. — Sputnik. Жогорку Кеңештин айрым депутаттары Автотранспорт каражаттарынын ээсинин жоопкерчилигин милдеттүү камсыздандырууну (ОСАГО) 2021-жылдын 7-февралына чейин жылдыруу" боюнча мыйзам долбоорун коомдук талкууга коюшту.

Мыйзам долбоору Жогорку Кеңештин расмий сайтына жарыяланган.

Азыркы редакциясына таянсак, "Автотранспорт каражаттарынын ээсинин жоопкерчилигин милдеттүү камсыздандыруу" тууралуу мыйзам ушул жылдын 7-февралында күчүнө кириш керек болчу.

Ага ылайык, ОСАГО полиси жок кармалган айдоочуларга 3000 миң сом өлчөмүндө, ал эми юридикалык жактарга 13 миң сомдон айып пул салынмак.

Мыйзам долбоорун жылдырууну депутаттар элдин ага даяр эместиги менен байланыштырышкан.

"Кыргызстанда пайдаланылган бардык унаа ээлерин милдеттүү камсыздандыруу коомдо активдүү талкууланып жатат. Калк кошумча чыгымдарга даяр эместиги, ошондой эле камсыздандыруу компенсация төлөмдөрү боюнча камсыздандыруу компанияларына ишеним жок экени байкалат", — деп жазылат сунушталып жаткан мыйзам долбоорунда.

Финкөзөмөл кызматы, шашпай, тынч камсыздандыруу компаниясын тандап, полис алууга мүмкүнчүлүк түзүү үчүн айдоочуларды 7-августка чейин акчалай айыпка жыкпай туруу сунушун киргизүүдө. Учурда аталган токтомдун долбоору министрликтер жана ведомстволордун макулдашуусуна жиберилип, коомдук талкууда турат.

Эске салсак, ОСАГО боюнча мыйзам 2016-жылдын 7-февралында күчүнө кирмек. Бирок, өлкөдөгү экономикалык абалга жана Жогорку Кеңештин демилгеси боюнча мыйзамдын күчүнө кирген мөөнөтү үч жылга узартылган, башкача айтканда 2019-жылдын 7-февралына чейин узартылган.