БИШКЕК, 24-дек. — Sputnik. Улуттук коопсуздук мамлекеттик комитети чагымчыл кабарларды жайылткан адамдарды аныктады. Алардын айрымдары кылган ишин моюнга алып, өкүнүп жатышканын билдиришти. Бул туурасында аталган комитеттин маалымат кызматы кабарлады.
УКМК Кыргызстанда Кытай жарандарынын укук бузган иш-аракеттери боюнча талкуулап, түрдүү маалыматтарды жайылтып жаткандар боюнча текшерүү жүргүзүүдө.
"Деструктивдүү күчтөр атайын даярдалган материалдарды таратып, коомчулуктун оюн башка нукка буруп Кыргызстандагы кырдаалды дестабилдештирүү максатын көздөшүүдө. Ал материалдардын арасында 2015-жылы Казакстанда мыкаачылык менен өлтүрүлгөн алты жашар кыздын тартылган видеосу дагы бар. Белгилей кетсек, бул иш боюнча күнөөлүүлөр кармалып соттолгон", — деп айтылат маалыматта.
Ошондой эле УКМК ушундай мыйзамсыз иш-аракеттерге курал болуп, кылмыштуу күчтөргө көмөкчү болбогула деп эскертет. Мындай учурда провокаторлор аныкталып, мыйзам чегинде жазага тартылат.
