БИШКЕК, 22-ноя. — Sputnik. Казакстандын Актөбө облусунун Косестек айылында белгисиз адам өрт коюп, окуя болгон жерге кол тамгасын калтырып кетүүдө. Бул туурасында Sputnik Казакстан
агенттиги жазды.
Маалыматка караганда от коюп кеткен киши кийинки өрттөй турган жайын белгилеп кат таштап кетүүдө. Кара мүртөздүн кесепетинен тогуз үй-бүлө зыянга учураган.
Мындай окуя ноябрь айында башталып, айылдыктарга коркунуч жаратууда. Эл күнү-түнү көз албай короосун кайтарып отурат. Мисалы, жети балалуу үй-бүлөнүн 2000 түк чөбүн өрттөп кеткен.
"Кошунабыздын короосунда өрт чыкканда барсак, жолдошумдун дарегине кат калтырган экен. Анда "Руслан, бүгүн жолуң болду, бирок сен кийинки кезектесиң!" деп жазыптыр. Муну түшүнө албай башыбыз катып жатат", — деп айткан айыл тургуну.
Косестек айылынын 50 жашоочусу полиция кызматкерлери менен күнү-түнү нөөмөткө туруп, өрт койгон кишини издеп жатышат.
